ناوەندی رۆشنبیری کوردی (رووناکی) و ڕێکخراوی جیهانی کورد لە رێکەوتی١٥ی مانگی دووی ٢٠٢١ وە هەموومان لە ژێر ناوی ڕێکخراوی جیهانی کورد دا بەیەکەوە درێژە بە تێکۆشانی ئەدەبی و فەرهەنگی خۆمان دەدەین

بۆ ڕای گشتی: بەرێزان ئەندامان، دۆستان، هۆگرانی فەرهەنگ و ئەدەبی کوردی.
لە چەند ساڵی رابردوو دا ناوەندی رۆشنبیری کوردی (رووناکی) و ڕێکخراوی جیهانی کورد بۆ کاری لێکۆڵینەوە لەسەر هەموو بوارەکانی پەیوەندیدار بە ژیانی نەتەوەیی کورد و پێشخستنی فەرهەنگی کوردی، تێکۆشانی بەرچاومان بووە و بە گوێرەی ئیمکان و دووریمان لە وڵات لە پێناو ئەرکی نیشتمانی هەندێ هەنگاوی باشمان هەڵێناوە، هەمووی بۆ پشت گرتنی خەبات لە کوردستان و پشتیوانی کردن لە ڕەوتی ماف خوازی گەلی کورد بووە.

ئێمە لە ناو ئەم دوو ناوەندە فەرهەنگیەدا ساڵانێکە لە پەیوەندی و هاوکاری نزیکی یەکتردا بوین، زۆر پرۆژەی فەرهەنگی هاوبەشمان لە سەر زمان و چاند و ئابووری و مێژووی کوردستان و زۆر بابەتی دیکە بە هاوکاری و هاوبەشی هەردوو لا بە ئەنجام گەیاندووە، لە هەر دوو ناوەند دا خاوەنی یەك ئامانج بووین لە سەر بنەمای هەستی نەتەوەیی و هەوڵ دان بۆ گەیشتن بە کوردستانێکی ئازاد.

لەو هاو خەباتیەدا هەمیشە ئەو بیرۆکەیە هەبووە، ئەگەر بگونجێ بۆ بەرێوە بردنی باشتری ئەرکەکانمان و هەڵهێنانەوەی هەنگاوی بەتینتر، ببینە یەک ناوەند بۆ ئەوەی چالاکیەکانمان باشتر پەرە پێ بدەین.

بە خۆشیەوە پاش راوێژی گەرم و گوڕ، پێك هاتین لەسەر تێکەڵکردنی هەردووك ناوەند، دوای ئەوەی قۆناخی پراکتیزەکردنی ئامانجەکانمان تێپەراند، لە رێکەوتی ١٥ ی مانگی دووی ٢٠٢١ وە هەموومان لە ژێر ناوی ڕێکخراوی جیهانی کورد دا بەیەکەوە درێژە بە تێکۆشانی ئەدەبی و فەرهەنگی خۆمان دەدەین.

ڕێکخراوی جیهانی کورد
ناوەندی رۆشنبیری کوردی (رووناکی )
١٥/٢/٢٠٢١